Astudiaeth Llywio Yfory

Diolch am gymryd rhan. Caiff y wybodaeth rydych chi'n ei rhoi i ni ei diogelu dan y gyfraith a chaiff ei thrin yn gyfrinachol.

Dysgwch fwy am sut rydym yn diogelu eich data.

Cyn dechrau, gwiriwch fod y llythyr wedi'i gyfeirio at eich cartref. Os nad ydych yn byw yn y cyfeiriad ar y llythyr, peidiwch â dechrau'r arolwg. Bydd angen i chi roi cod mynediad y cartref o'ch llythyr er mwyn dechrau.

Dechrau nawr

Mae’r astudiaeth Llywio Yfory yn trafod amrywiaeth o bynciau, gan gynnwys:

• gwaith, ymddeoliad a diweithdra

• hyfforddiant ac addysg

• iechyd a llesiant

• teithio i'r gwaith

• nodweddion a chefndir

Dylech gwblhau'r arolwg erbyn y dyddiad cau sydd yn eich llythyr. Ar ôl i’ch cartref cyfan gwblhau’r arolwg, byddwn yn cynnig taleb rhodd gwerth £10 i chi.

Gall y cwestiynau fod yn seiliedig ar ffeithiau neu farn. Nid oes angen unrhyw wybodaeth arbenigol i gymryd rhan. Mae eich atebion gonest yn ein helpu i gynhyrchu ystadegau dibynadwy am y gymdeithas.

Caiff eich atebion eu cadw bob tro y byddwch chi'n symud i'r dudalen nesaf. Gallwch ddychwelyd i orffen yr arolwg unrhyw bryd hyd at y dyddiad cau gan ddefnyddio'r un cod mynediad. Mae hyd yr arolwg yn dibynnu ar nifer y bobl yn y cartref a'u nodweddion.

Er mwyn cadw eich data yn ddiogel, bydd adrannau'r arolwg yn cael eu cloi yn awtomatig wrth i chi fynd drwyddyn nhw. Mae hyn yn golygu na allwch chi nac unrhyw aelod arall o'r cartref eu gweld mwyach. Ar ôl i'r adrannau gael eu cloi, ni allwch newid atebion.

Os na allwch ddychwelyd i gwblhau'r arolwg, bydd y wybodaeth rydych wedi'i rhannu â ni yn ddefnyddiol o hyd. Caiff data sydd wedi'u cadw eu cyflwyno a, lle y bo'n bosibl, byddan nhw'n cael eu defnyddio er mwyn dadansoddi.

Mae'r arolwg ar gael ar lein yn Gymraeg ac yn Saesneg, a gallwch newid yr iaith ar unrhyw adeg.

Fel arall, gallwch gysylltu â ni os hoffech chi:

• drefnu cyfweliad dros y ffôn

• cael gwybodaeth am ein gwasanaeth cyfieithu

• gofyn am lythyrau print mawr neu Braille

• gofyn cwestiynau pellach

Dylai pawb sy'n byw yn eich cyfeiriad gymryd rhan gan ddefnyddio'r un cod mynediad ar gyfer y cartref o'r llythyr a gawsoch. Gall unrhyw un sy'n 16 oed neu drosodd ateb drosto'i hun neu ar ran aelodau eraill o'r cartref os byddan nhw'n rhoi caniatâd.

Mae'r arolwg yn gofyn cwestiynau manwl, felly byddai'n well pe bai pob person yn ateb ei adran ei hun. Gallech chi ofyn am help gan unrhyw oedolyn arall i gwblhau’r astudiaeth os bydd angen.

Mae nifer bach o gwestiynau am aelodau o'r cartref sy'n 15 oed neu'n iau, a dylai oedolyn ateb y rhain ar eu rhan.

Mae'n bwysig bod pawb sy'n 16 oed neu drosodd yn eich cartref yn gweld y wybodaeth rydym ni'n eu hanfon ac yn cytuno i gymryd rhan.

I gael rhagor o wybodaeth am ein hastudiaethau, gweler ein hastudiaethau.

Mae'r Swyddfa Ystadegau Gwladol yn cynnal llawer o astudiaethau gwahanol i gynhyrchu ystadegau swyddogol. Dysgwch fwy ynglŷn ag astudiaethau am bobl, teuluoedd a chartrefi.

Caiff yr astudiaeth hon ei chynnal gan y Swyddfa Ystadegau Gwladol (y SYG), sef cynhyrchydd ystadegau annibynnol mwyaf y DU. Nid yw'r SYG yn gysylltiedig ag unrhyw blaid wleidyddol. Darllenwch fwy amyr hyn rydym yn ei wneud. 

Mae cymryd rhan yn yr astudiaeth hon yn gyfle i chi helpu ni i ddeall anghenion newidiol y gymuned gyfan. 

Caiff y wybodaeth rydych chi'n ei rhoi ei defnyddio i greu ystadegau, fel cyfraddau cyflogaeth a diweithdra swyddogol. Mae'r ystadegau yn dylanwadu ar gyfraddau llog, sy'n cael effaith ar forgeisi, dyledion, pensiynau a chynilon. Gallwch ddarllen am y rhain yn ein bwletinau ystadegol (Saesneg yn unig). 

Mae adrannau'r llywodraeth, cyrff cyhoeddus ac elusennau yn defnyddio ein hystadegau ar gyfer llawer o brosiectau, gan gynnwys:  

• gwella gwasanaethau gofal iechyd, llesiant a gofal cymdeithasol  

• dileu rhwystrau i waith a chefnogi pobl nad ydyn nhw'n gallu gweithio  

• diwallu'r angen am dai, lleoedd mewn ysgolion a gwasanaethau ailgylchu  

Mae gan gyfeiriadau siawns deg a chyfartal o gael eu dewis i gymryd rhan a ni ellir dewis cartref arall yn eu lle. Mae'n bwysig cynrychioli eich ardal leol, er nad oes rhaid i chi gymryd rhan. 

Ni ellir dod o hyd i'r wybodaeth rydych chi'n ei darparu yn unrhyw le arall. Cewch gynnig taleb rhodd gwerth £10 i ddiolch i chi o fewn 30 diwrnod o'ch eich cartref cyfan yn cwblhau'r arolwg. Dysgwch fwy am daleb rhodd Llywio Yfory. 

O bryd i'w gilydd efallai y byddwn yn cynnal ymchwil arbrofol sy'n golygu nad yw eich data yn cael ei ddefnyddio'n uniongyrchol ar gyfer allbynnau ond yn cael ei ddefnyddio i lywio newidiadau i'r offeryn casglu data. Mae'r ymchwil hwn yn bwysig i'n helpu i wella ansawdd data a sicrhau bod unigolion ar draws y DU yn cael eu cynrychioli'n briodol yn ein hystadegau.

Mae rhai cyfeiriadau yn cael eu gwahodd i gymryd rhan yn ein hastudiaeth pum rhan i’n helpu i fesur newidiadau dros amser. Mae’r cyfeiriadau hyn yn cael eu dewis ar hap i gynrychioli eu cymuned.

Os ydych chi wedi cael eich dewis, gofynnir i chi gwblhau’r un arolwg bob tri mis, hyd at bum gwaith i gyd. Po fwyaf o arolygon y byddwch chi’n eu cwblhau, y mwyaf defnyddiol yw eich atebion.

Byddwch yn cael cynnig taleb rhodd gwerth £10 bob tro y bydd y cartref cyfan yn cwblhau arolwg yn llawn. Mae hynny’n werth hyd at £50 o dalebau rhodd os ydych chi’n cwblhau pob un o’r 5 arolwg. Peidiwch â phoeni os byddwch chi’n colli arolwg, byddwch yn dal i gael eich gwahodd i gwblhau’r un nesaf. Os byddwch chi’n colli mwy nag un arolwg yn olynol, byddwn yn eich tynnu o’r astudiaeth.

Mae’n bwysig ein bod ni’n clywed gennych chi bob tro, hyd yn oed os nad oes unrhyw beth wedi newid. Mae gofyn cwestiynau dros amser yn ein helpu i ddeall bywyd yn y DU a sut mae’n newid.

Rydym yn gwybod na fydd rhywfaint o’r wybodaeth rydych chi’n ei rhoi i ni yn newid, fel eich dyddiad geni, gwybodaeth gymdeithasol-ddemograffig a chymwysterau ‘r gorffennol. Dros y misoedd nesaf, byddwn yn gweithio ar welliannau i'ch arbed rhag rhoi’r wybodaeth hon i ni lawer o weithiau. Unwaith y byddwn wedi gweithredu’r gwelliannau hyn, byddwn yn ailddefnyddio’r atebion y gwnaethoch chi ei darparu y tro cyntaf ar gyfer yr holl arolygon yn y dyfodol y byddwch yn dewis eu cwblhau fel rhan o’r astudiaeth hon. Bydd hyn yn golygu y dylai arolygon dilynol fod yn gyflymach na’r un cyntaf rydych chi’n ei gwblhau.

Er mwyn sicrhau ein bod yn ailddefnyddio gwybodaeth gywir yn unig, pan fyddwch chi’n dechrau arolwg newydd byddwn yn dangos rhestr o enwau’r bobl oedd yn byw yn y cyfeiriad ar gyfer rhan flaenorol yr astudiaeth. Gofynnir i chi a yw’r un bobl yn byw yno. Gallwch ddiweddaru’r wybodaeth os yw pobl wedi symud neu newid enwau. Er mwyn cadw data pawb yn ddiogel, ni fyddwch yn gweld unrhyw atebion o arolygon blaenorol ac eithrio enwau.

Mae’n bosibl y gallai’r preswylwyr sy’n byw yn y cyfeiriad a samplwyd newid yn ystod yr astudiaeth. Os byddwch yn symud allan o’r cyfeiriad cyn i’r pum rhan gael eu cwblhau, bydd preswylwyr newydd y cyfeiriad yn cael eu gwahodd i gwblhau’r arolwg nesaf.

Os bydd y preswylwyr newydd yn dewis cymryd rhan, bydd enwau’r bobl a gwblhaodd yr arolwg yn flaenorol yn cael eu dangos. Mae hyn er mwyn iddynt allu dweud wrthym a yw’r wybodaeth hon yn anghywir a’i diweddaru. Dim ond enwau a nid unrhyw wybodaeth arall am y bobl hynny fydd ar gael. Mae eich atebion yn ddiogel ac yn breifat. Rydym yn prosesu eich data personol yn unol â GDPR y DU.

Mae’n bwysig ein bod ni’n deall amgylchiadau’r bobl sy’n byw yn y cyfeiriad ar hyn o bryd ac nid oes ots os ydyn nhw’n bobl wahanol i’r rhai a gymerodd ran y tro diwethaf. Bydd hyn yn ein helpu i ddeall sut mae anghenion cymunedau lleol yn newid dros amser.

Caiff y wybodaeth rydych chi'n ei rhoi ei chyfuno â data o bob rhan o'r wlad ac ni chaiff ei defnyddio i'ch adnabod chi na'ch cartref mewn unrhyw ffordd. 

Caiff yr holl wybodaeth rydych chi'n ei rhoi ei diogelu gan y gyfraith a'i thrin yn gyfrinachol o dan y Cod Ymarfer ar gyfer Ystadegau (yn Saesneg).

Caiff y wybodaeth a gaiff ei chasglu ei chadw yn ddiogel am bum mlynedd neu hyd nes na chaiff ei defnyddio mwyach i gynhyrchu ystadegau. Caiff ei dileu wedyn. Caiff yr holl fanylion y gellid eu defnyddio i adnabod person eu dileu ar y cam cynharaf posibl.

Gall y wybodaeth ddad-adnabyddedig hon gael ei rhannu ag ymchwilwyr achrededig cymeradwy at ddibenion ystadegol yn unig. Caiff gwybodaeth ei rhannu drwy ein Gwasanaeth Ymchwil Diogel. Dysgwch fwy am ein cynllun ymchwilwyr cymeradwy (Saesneg yn unig).

Mae'r SYG wedi comisiynu trydydd parti, sef Asiantaeth Ystadegau ac Ymchwil Gogledd Iwerddon (NISRA), i gynnal rhywfaint o'r broses casglu data ar gyfer yr astudiaeth Llywio Yfory. 

Bydd y SYG yn cael yr holl ddata a gaiff eu casglu ac yn parhau i reoli'r holl wybodaeth a roddir gan bawb sy'n cymryd rhan.

Mae'r SYG yn rhannu gwybodaeth a ddewiswyd â darparwyr gwasanaethau er mwyn cynnal ein hastudiaethau. Dim ond y wybodaeth sydd ei hangen arnyn nhw i gyflawni eu rôl y byddan nhw'n ei chael.

Mae'r sefydliadau hyn yn helpu'r SYG i:  

• anfon eich taleb rhodd - y darparwr gwasanaeth ar gyfer hyn yw Pluxee is-gwmni i Sodexo (Saesneg yn unig).

• cysylltu â chi gyda'ch caniatâd - y darparwyr gwasanaethau hyn yw GovDelivery (Saesneg yn unig) a GovNotify (Saesneg yn unig).  

• casglu'r wybodaeth rydych chi'n ei rhoi yn ddiogel - y darparwyr gwasanaethau hyn yw NISRA (Saesneg yn unig) a TotalMobile (Saesneg yn unig).  

Caiff eich enw a'ch cyfeiriad e-bost eu rhannu â Pluxee er mwyn anfon eich e-daleb. Ni fydd Pluxee yn defnyddio'r wybodaeth hon at unrhyw ddibenion eraill. Gall manwerthwyr cymwys newid yn unol â thelerau ac amodau Pluxee. Mae cerdyn rhodd plastig ar gael ar gais, ond gall y manwerthwyr amrywio. Dysgwch fwy am daleb rhodd Llywio Yfory.

I gael rhagor o wybodaeth, darllenwch ein gwybodaeth am ddiogelu data (Saesneg yn unig) a Diogelu data ac astudiaethau am bobl, teuluoedd a chartrefi.

I gael cymorth hygyrchedd, e-bostiwch accessibility@ons.gov.uk.

I gymryd rhan dros y ffôn, ffoniwch ni am ddim ar 0800 085 7376.

Yr amseroedd agor yw:

Dydd Llun i ddydd Gwener 9am i 6pm
Dydd Sadwrn 9am i 1pm

I gael rhagor o wybodaeth am ein hastudiaethau cymdeithasol, gweler ein hastudiaethau.

Os oes gennych unrhyw ymholiadau eraill, gweler ein tudalen we cysylltu â ni.

Pan fyddwch yn barod i gymryd rhan, ewch nôl i dechrau'r astudiaeth.