Amcangyfrifon o’r boblogaeth a chartrefi, Cymru a Lloegr: Cyfrifiad 2021, data heb eu talgrynnu

Rhyddhawyd amcangyfrifon Cyfrifiad 2021 o'r boblogaeth a chartrefi wedi'u talgrynnu ar gyfer awdurdodau lleol yng Nghymru a Lloegr ar 28 Mehefin 2022. Roedd y bwletin yn archwilio newid dros amser, amrywiadau rhanbarthol a chyfansoddiad y boblogaeth yn ôl rhyw a grŵp oedran pum mlynedd.

Mae'r diweddariad hwn yn rhoi amcangyfrifon o'r boblogaeth a chartrefi heb eu talgrynnu, yn ôl rhyw ac un flwyddyn o oedran. Mae'r data ategol wedi'u cyflwyno ar gyfer ardaloedd daearyddol manylach fyth, i lawr i Ardaloedd Cynnyrch (yn Saesneg) lle y bo modd.

• Ar Ddiwrnod y Cyfrifiad, 21 Mawrth 2021, maint y boblogaeth breswyl arferol yng Nghymru a Lloegr oedd 59,597,542 (3,107,494 yng Nghymru a 56,490,048 yn Lloegr); dyma'r boblogaeth fwyaf a gofnodwyd erioed drwy gyfrifiad yng Nghymru a Lloegr.

• Cynyddodd poblogaeth Cymru a Lloegr fwy na 3.5 miliwn (6.3%) ers y cyfrifiad diwethaf yn 2011, pan oedd yn 56,075,912.

• Cynyddodd y boblogaeth ym mhob un o'r naw rhanbarth yn Lloegr, a chynyddodd yng Nghymru hefyd; y rhanbarth lle cynyddodd y boblogaeth fwyaf oedd Dwyrain Lloegr, i fyny 8.3% o 2011 (cynnydd o oddeutu 488,000 o breswylwyr).

• Roedd 30,420,202 o fenywod (51.0% o'r boblogaeth) a 29,177,340 o ddynion (49.0%) yng Nghymru a Lloegr.

• Roedd 24,783,199 o gartrefi yng Nghymru a Lloegr ar Ddiwrnod y Cyfrifiad; cynyddodd nifer y cartrefi fwy nag 1.4 miliwn ers 2011 (6.1%), pan oedd 23,366,044 o gartrefi. Yr oedran canolrifol yng Nghymru a Lloegr oedd 40 oed (42 oed yng Nghymru, 40 oed yn Lloegr); mae hyn yn uwch na'r oedran canolrifol ledled Cymru a Lloegr yn 2011, sef 39 oed.

• Y rhanbarth o Loegr â'r oedran canolrifol uchaf oedd De-orllewin Lloegr (44 oed) a'r rhanbarth o Loegr â'r oedran canolrifol isaf oedd Llundain (35 oed).

• Ledled Cymru a Lloegr, yr awdurdodau lleol â'r oedran canolrifol uchaf oedd Gogledd Norfolk (54 oed), Rother (53 oed) a Dwyrain Lindsey (52 oed).

• Yr awdurdod lleol â'r oedran canolrifol isaf oedd Tower Hamlets (30 oed), yna Nottingham, Caergrawnt, Rhydychen a Manceinion (pob un yn 31 oed).

Dewiswch ardal i weld sut mae oedran canolrifol yn amrywio ar draws pob awdurdod lleol yng Nghymru a Lloegr.

Ffigur 1: Roedd awdurdodau lleol â mwy o fyfyrwyr prifysgol yn tueddu i gael oedran canolrifol is

Strwythur oedran y boblogaeth, 2021, awdurdodau lleol yng Nghymru a Lloegr

Nodiadau

1. Yr oedran canolrifol yw oedran y person yng nghanol y grŵp, fel bod un hanner o'r grŵp yn iau na'r person hwnnw a'r hanner arall yn hŷn.
   
2. Mae oedran yn cyfeirio at oedran person ar ei ben-blwydd diwethaf yn hytrach na'r union oedran.
   
3. Caiff canrannau eu talgrynnu i un lle degol.

Lawrlwytho'r data

.xlsx

Dyddiad cyfeirio

Mae'r cyfrifiad yn rhoi amcangyfrifon o nodweddion pob unigolyn a chartref yng Nghymru a Lloegr ar Ddiwrnod y Cyfrifiad, 21 Mawrth 2021. Caiff ei gynnal unwaith bob 10 mlynedd ac mae'n rhoi'r amcangyfrif mwyaf cywir o'r holl bobl a chartrefi yng Nghymru a Lloegr i ni.

Rydym yn gyfrifol am gynnal y cyfrifiad yng Nghymru a Lloegr, ond byddwn hefyd yn rhyddhau allbynnau ar gyfer y Deyrnas Unedig mewn partneriaeth â Llywodraeth Cymru, Cofnodion Cenedlaethol yr Alban ac Asiantaeth Ystadegau ac Ymchwil Gogledd Iwerddon. Cafodd y cyfrifiad yng Ngogledd Iwerddon ei gynnal ar 21 Mawrth 2021 hefyd, ond cafodd cyfrifiad yr Alban ei symud i 20 Mawrth 2022. Mae holl swyddfeydd y cyfrifiad yn y Deyrnas Unedig yn gweithio'n agos i ddeall sut y bydd y gwahaniaeth hwn mewn dyddiadau cyfeirio yn effeithio ar ystadegau poblogaeth a thai'r Deyrnas Unedig gyfan, o ran yr amseru a'r cwmpas.

Cyfradd ymateb

Cyfradd ymateb unigolion yw nifer y preswylwyr arferol y cafodd manylion unigol eu darparu ar eu cyfer ar holiadur a ddychwelwyd, wedi'i rannu ag amcangyfrif o'r boblogaeth breswyl arferol.

Y gyfradd ymateb unigolion ar gyfer Cyfrifiad 2021 oedd 97% o boblogaeth breswyl arferol Cymru a Lloegr, a dros 88% ym mhob awdurdod lleol. Cafodd y rhan fwyaf o ffurflenni (89%) eu derbyn ar lein. Gwnaeth y gyfradd ymateb ragori ar ein targed, sef 94% yn gyffredinol ac 80% ym mhob awdurdod lleol.

Ansawdd

Oherwydd effaith y broses o ddileu talgrynnu a rhoi prosesau ystadegol eraill ar waith, gall fod gwahaniaethau bach iawn ar gyfer rhai awdurdodau lleol rhwng yr amcangyfrifon wedi'u talgrynnu a heb eu talgrynnu o'r boblogaeth a chartrefi.

Mae rhagor o wybodaeth am ansawdd a methodoleg ar gryfderau, cyfyngiadau, defnyddiau priodol a'r modd y cafodd y data eu creu ar gael yn yr adroddiad Gwybodaeth am Ansawdd a Methodoleg ar gyfer Cyfrifiad 2021. Ceir rhagor o wybodaeth am ein prosesau sicrhau ansawdd yn ein hadroddiad am Sicrhau bod amcangyfrifon poblogaeth Cyfrifiad 2021 o'r ansawdd gorau posibl (yn Saesneg).