Defnyddio Rhifau: Archwilio Economeg

Mae Archwilio Economeg yn gyfres newydd o gynlluniau gwersi a phecynnau cymorth sy’n rhan o’n rhaglen addysg Defnyddio Rhifau. Wedi’u halinio â’r cwricwlwm yng Nghymru a Lloegr, rydym wedi llunio’r adnoddau hyn i helpu myfyrwyr 16 oed a hŷn i fod yn fwy ymwybodol o’r hyn a wnawn yn y Swyddfa Ystadegau Gwladol (SYG).

Gan ganolbwyntio ar bwysigrwydd ystadegau economaidd, maent yn galluogi myfyrwyr i weithio’n hyderus gyda data byd go iawn y SYG, gan ddatblygu eu sgiliau ystadegol a’u sgiliau llythrennedd data.

Gallwch ddefnyddio’r adnoddau newydd hyn i gefnogi gwersi Economeg, Astudiaethau Busnes a Daearyddiaeth, a’u haddasu hefyd i’w defnyddio mewn pynciau eraill.

Ar gyfer pob un o’r tri phwnc, rydym wedi creu:

• canllaw i athrawon sy’n rhoi trosolwg o’r tasgau a’r cynlluniau gwersi

• pecyn cyflwyno i arwain myfyrwyr drwy bob cam o’r prosiect

• pecyn cymorth i fyfyrwyr gyda nodiadau i’w helpu i gwblhau’r tasgau a’r cwestiynau

Gan ddefnyddio’r adnoddau hyn sydd wedi’u halinio â’r cwricwlwm, gallwch helpu myfyrwyr i ddadansoddi, cwestiynu a chymhwyso data i faterion ymarferol, gan eu helpu i ddatblygu sgiliau meddwl beirniadol pwysig.

Mae’r pecyn cymorth hwn yn helpu myfyrwyr Economeg i ddeall sut mae perfformiad economi’r Deyrnas Unedig yn cael ei fesur. Gall myfyrwyr ddefnyddio offer presennol y SYG, fel yr offeryn Archwilio ystadegau lleol, a data o’r Mynegai Prisiau Defnyddwyr gan gynnwys costau tai perchen-feddiannwyr (CPIH). Bydd y rhain yn helpu myfyrwyr i archwilio tueddiadau a deall sut mae’r tueddiadau hyn yn effeithio ar incwm go iawn.

Adnoddau

Lawrlwytho pecyn cymorth myfyrwyr Economeg

Lawrlwytho pecyn cyflwyniadau Economeg

Lawrlwytho canllaw athrawon Economeg

Mae’r pecyn cymorth hwn yn archwilio sut mae poblogaeth a demograffeg yn effeithio ar gynllunio busnes a gwneud penderfyniadau. Gall myfyrwyr Astudiaethau Busnes ddefnyddio’r offeryn Creu set ddata arbennig a’n setiau data amcangyfrifon poblogaeth. Bydd y rhain yn eu helpu i edrych ar sut mae demograffeg yn effeithio ar alw defnyddwyr a chyflenwad llafur yn y Deyrnas Unedig.

Adnoddau

Lawrlwytho pecyn cymorth myfyrwyr Astudiaethau Busnes

Lawrlwytho pecyn cyflwyniadau Astudiaethau Busnes

Lawrlwytho canllaw athrawon Astudiaethau Busnes

Mae’r pecyn cymorth hwn yn archwilio sut y gall newid economaidd effeithio ar ardal leol myfyrwyr, yn ogystal â phenderfyniadau ynghylch gwasanaethau lleol, rhanbarthol a chenedlaethol. Gall myfyrwyr Daearyddiaeth ddefnyddio setiau data o’r offeryn Archwilio ystadegau lleol a’r offeryn Creu proffil ardal penodol. Bydd y rhain yn eu helpu i ddatblygu eu sgiliau dadansoddi ac i ddysgu sut i ddehongli data daearyddol.

Adnoddau

Lawrlwytho pecyn cymorth myfyrwyr Daearyddiaeth

Lawrlwytho pecyn cyflwyniadau Daearyddiaeth

Lawrlwytho canllaw athrawon Daearyddiaeth

Rydym hefyd wedi creu pum pecyn cymorth Defnyddio Rhifau arall sy’n canolbwyntio ar wahanol offerynnau a setiau data’r SYG. Mae’r pecynnau cymorth hyn yn cwmpasu:

• Bwlch cyflog rhywedd

• Chwyddiant

• y Cyfrifiad

• Iechyd a lles

• Busnes, diwydiant a masnach

Lawrlwytho ein pum pecyn cymorth ystafell ddosbarth am ddim